හමුවක පෙම
Photo by Văn Thắng: pexels-1415131
නුබේ අතැඟිලි රිදුම් නිවනට
මගේ දෑතේ නවාතැන් දෙමි
නුබේ හිස පපුතුරෙ සතපා
හදේ ගීතය අසන්නට දෙමි
අකීකරු කෙහෙරැළි තුඩින් ගෙන
සඳක හැඩ සුළඟකට කියමි
කදුළු මල් නොපිපෙන්න තද කොට
දෙතොල තරු පාමුලින් තබමි
හිරුගෙ නොනිමෙන පෙමක සිසිලස
තරු නිවාගත් සඳට කියමි
නිවෙන තරු දෙස බලා සිටිමි
සෝක ලතැවුල් නිවා ගනිමි
නැගුනොතින් වැහි වළාවක් කළු
කොපුල් මත තරු රටා අඳිමි
ගිලී ඇස් කව්ළුවෙන් හදගැබ
ඔබේ දුක් පොත සොයා ගනිමි
එකින් එක දුක් අකුරු ගලවා
ඔබ කැමති කවි ලියා තබමි
ඔබේ එක හොද සිනා කටකට
මමත් වරුවක් සිනා සලමි
ඉතිං කොහොමද මිමුනුවිට තරු
බැබලුනොත් සඳ වරක් සිඹිමි
සඳයි තරුවයි රවන විට මම
ඇස් වසාගෙන
නින්ද රඟමි
සක් දෙවිඳු බැස කණට කොදුරා
තිදසපුර යනු!. බැහැයි කියමි
ඇස අගින් මම ඔහුට සන් කොට
හිරු නිවායන ලෙසට යදිමි
යලිත් මෙතැනම ඉපිදවී නම්
මරණයද සතුටින්ම පතමි
No comments:
Post a Comment