Gala Yanu Mana Oba-ගලා යනු මැන ඔබ-You Should Flow-Mathaka Amathum-Nimalasiri Kalubadanagama

ගලා යනු මැන ඔබ...

Photo by unsplash.com

  කඩදාසි මල් පිරුණු

මිටියාවතින් හැරී

රළු බොරළු මඩ ගොහොරු 

හෙමින් පසු කර එමී

හද මඩල අවදිවී  

ඒ සිනා හඩ ඇසී

සසරෙ පෙර  පුරුද්දෙන්  

ඔබව  හදුනාගමී

 

සිනා දහසක් එකම 

සිනාවක් මත රැදී

ඇද හැළෙන කාන්තිය 

නෙත් පුරා විදගමී

ලෙසින් සඳ එළිය මිස 

සඳක්  හිමිවී නැතී

ඔබේ එක දිය බිඳක් 

දෙතොල තවරා ගමී

 

අසනි වැසි මැද තෙමී

හිතක් ඇත ගල් ගැසී

පැතුම් මල් පෙණ පොදී 

රඟන  දෑතේ වෙලී

ඔබම තෝරා ඇතී 

සොදුරු ගමනක් ඇතී

ගලන්නට ගිගුම්   දී   

ඉතින් මම නවතිමී

 -

වරක්  නැවතී හැරී 

ඔබේ රුව ඇඳ  ගමී

මතු සසරෙ දිනකදී  

දිය සොයා පැමිණෙමී

 

Diya Rela-දිය රළ-Wave-Mathaka Amathum-Nimalasiri Kalubadanagama

 දිය රළ

Photo by unsplash.com

  

සයුරු තෙර රළ පෙනෙන මානෙක  

විසුල වැලි මාළිග  තනා

ඔබේ  රුව සුදු වැලි තලා මත

නිදි වරා සිතුවම් කළා

පෙන පබළු අමුණා සුදෝ සුදු

සොඳුරු සිරියහනක් තනා

ඔබ කැමති කවි ලියා පෙති මත

වන මලින් වියනක් කළා

වසත් කල මේ  දැන් එතියි  සිතු

කල්පයක් ගෙවිලා ගියා

 

වියළි තොල දිය යදින සවසක

ගිමත් කල නිමවා තියා

සිහිල ගෙන  දියරළක් සපැමිණ

වැලිකතර උයනක් කළා

ස්නේහයක පෙර පුරුදු සුවඳක්

හදවතේ ගල්වා තියා

මතක එළියක් ඉතිරි කොට හෙට

ආ සැණින් පිටවී ගියා

 

කල්පයක් මා සමඟ  උන් සිත

රළ අතර සැඟවී  ගියා

Ae Kanda-ඒ කන්ද-That Mountain-Mathaka Amathum-Nimalasiri Kalubadanagama

ඒ කන්ද 

Photo by Taryn Elliott:.pexels.com

නටුව හල මිලින මල්

රැගෙන යන  සුළං රැල්

මල් හෙටත් පිපෙන බව කීවේ

 

අද ලෙසම හිරු හෙටත්

රැස් දහර නෙවෙනස්ව

ගෙනෙන  බව  සඳු රැයෙම  කීවේ

 

නැගී එන පුර සඳක්

නිවී යන බව හෙමින්

නිදිවරා තරු බලා උන්නේ

 

හිරුත් නැති සඳුත් නැති

ගිරි සිරස මත දිලී

එකම තරුවකි අඳුර බින්දේ

 

ඇසිල්ලෙක  ඇස වැසී

තරුව වැටුණිය ලිහී

ඒ කන්ද නෑ තාම දන්නේ

 

දැවී සැඩ හිරු ගින්නේ

තෙමී ගල්වෙන පින්නෙ

ඒ තරුව දකින  තුරු  ඉන්නේ

 

පිසින  මද නල තුටින

ගලන ගං දිය සොබන

පමණි දුර සිට දනෝ වින්දේ

 

කඳුළු උණු දිය  උනන

ළසෝ සුසුමක්  නැගෙන

කැකෑරෙන යමහලක්

කන්ද සඟවන බවක්

කිසි කෙනෙක් නෑ තවම දන්නේ

Api Iththo-අපි ඉත්තෝ-We are Checkers-Mathaka Amathum-Nimalasiri Kalubadanagama

 

                අපි ඉත්තෝ!!

Photo by Tai's Captures on Unsplash

අහක ලූ  දඩු   කඩින්                     ඉපදුනි

පයින් මැඩ රළු බිමේ                    ඔපවුනි

පාට දෙකකින්     බෙදී                  වෙන්වුනි

කඩු අමෝරා සටන්                      ඇරඹිණි

 

කපන උන්  උඩට

කැපෙන උන් අහකට

 

කැපූ කල ආදරෙන් හාදු දී

කැපුනු කල තූ!  කියා නිගරු දී

අඳ බාල උන් ඔහේ  අදින අතකට ඇදී

රාමුවක   ඉමු ඇලී ජිවිතය පුස් බැදී

අපේ  ඉරණම  උන්ගෙ  සෙල්ලමකි නැති බැඳී  

 

කැපූ  උන් කැපුන උන් යළි එකට මුණ ගැසී

අඳුරු අගු පිලට  වී   දිවි ගෙවමු හිරිවැටී

ඇදපු උන් මධු සාද ජය නදින් බිහිරි වී

අපි අපිම කැති ගාමු හෙටත් දෙපසට බෙදී

 

අපි ඉත්තෝ!!

Hima Vatena Wasanthaya-හිම වැටෙන වසන්තය-Snowy Spring-Mathaka Amathum-Nimalasiri Kalubadanagama

හිම වැටෙන වසන්තය

Photo by Sid Sun on Unsplash

 

හිරු පිපී හිනැහෙද්දී -ලා  රතු

අහස් ගැබ තටු -සලා ඉගිලෙන

විහඟ ගී නද  -අසනු  ලොබ වී  

ළපළු කන් පෙති -මවා තුරැ හිස

පන ලබා නව -අගිසි මත රතු

කැකුළු මල් තුඩ -සුවඳ විහිදෙන

ඔබ රැගෙන  එන  -වසන්තය මග

නතර කොට  මා -අතින් ඇදගෙන

ඔහුගේ අභියස  -පුදුම කරනට

ගෙවෙන හැම තත්-පරය අග ඔබ

එතැයි මම මග  -බලා සිටියෙමි.

 

හිරු වසා කළු  -වළාකුලකින්

වියරු සුළගක් -තොල සපාගෙන

අහස කැළඹී -වේදනාවෙන්

කඳුළු වගුරනු -බලා තුරැ හිස

බියෙන් හැකිලී -ලපළු අතු ඉති  

කැකුළු මල්  යායක්  -වැටී  බිම

ඇස් දවා යන  -හිම පියලි ගෙන  

කුණාටුව  දොර -අගුළු බිදගෙන

සම සිඳී ඇට-මිදුළු දක්වා

සියුම් රිදුමක් -ඉතිරිකර හෙට

දිනක් ඔබ මා -වෙත ගෙනා හැටි