Api Iththo-අපි ඉත්තෝ-We are Checkers-Mathaka Amathum-Nimalasiri Kalubadanagama

 

                අපි ඉත්තෝ!!

Photo by Tai's Captures on Unsplash

අහක ලූ  දඩු   කඩින්                     ඉපදුනි

පයින් මැඩ රළු බිමේ                    ඔපවුනි

පාට දෙකකින්     බෙදී                  වෙන්වුනි

කඩු අමෝරා සටන්                      ඇරඹිණි

 

කපන උන්  උඩට

කැපෙන උන් අහකට

 

කැපූ කල ආදරෙන් හාදු දී

කැපුනු කල තූ!  කියා නිගරු දී

අඳ බාල උන් ඔහේ  අදින අතකට ඇදී

රාමුවක   ඉමු ඇලී ජිවිතය පුස් බැදී

අපේ  ඉරණම  උන්ගෙ  සෙල්ලමකි නැති බැඳී  

 

කැපූ  උන් කැපුන උන් යළි එකට මුණ ගැසී

අඳුරු අගු පිලට  වී   දිවි ගෙවමු හිරිවැටී

ඇදපු උන් මධු සාද ජය නදින් බිහිරි වී

අපි අපිම කැති ගාමු හෙටත් දෙපසට බෙදී

 

අපි ඉත්තෝ!!

Hima Vatena Wasanthaya-හිම වැටෙන වසන්තය-Snowy Spring-Mathaka Amathum-Nimalasiri Kalubadanagama

හිම වැටෙන වසන්තය

Photo by Sid Sun on Unsplash

 

හිරු පිපී හිනැහෙද්දී -ලා  රතු

අහස් ගැබ තටු -සලා ඉගිලෙන

විහඟ ගී නද  -අසනු  ලොබ වී  

ළපළු කන් පෙති -මවා තුරැ හිස

පන ලබා නව -අගිසි මත රතු

කැකුළු මල් තුඩ -සුවඳ විහිදෙන

ඔබ රැගෙන  එන  -වසන්තය මග

නතර කොට  මා -අතින් ඇදගෙන

ඔහුගේ අභියස  -පුදුම කරනට

ගෙවෙන හැම තත්-පරය අග ඔබ

එතැයි මම මග  -බලා සිටියෙමි.

 

හිරු වසා කළු  -වළාකුලකින්

වියරු සුළගක් -තොල සපාගෙන

අහස කැළඹී -වේදනාවෙන්

කඳුළු වගුරනු -බලා තුරැ හිස

බියෙන් හැකිලී -ලපළු අතු ඉති  

කැකුළු මල්  යායක්  -වැටී  බිම

ඇස් දවා යන  -හිම පියලි ගෙන  

කුණාටුව  දොර -අගුළු බිදගෙන

සම සිඳී ඇට-මිදුළු දක්වා

සියුම් රිදුමක් -ඉතිරිකර හෙට

දිනක් ඔබ මා -වෙත ගෙනා හැටි

Ma Puthanuvani-ම පුතුණුවෙනි-My Son-Mathaka Amathum-Nimalasiri Kalubadanagama

ම පුතුණුවෙනි!

 

Photo by David Peters on Unsplash

(අවසන් ගමන් යාම සදහා තෝරාගත හැකි විවිධ අංගෝපාංගයන්ගෙන් යුතු  අවමංගල පැකේජ ඇතුලත් මෙනුපත දැක ලියු කවිය)

නැගුණත්  හිරැ එළිය  කර

බැස යයි  ලොව ඇඳීරි කර

පිපුනත්   මල් සුවඳ කර

ගිලිහෙයි රුව මිලින කර

තැනුවත් යකුරු උණු කර

පස් වේ යදම් මළ කර

ගලා එන මහ නදී සැඩකර

සැනහී නිදති සමුදුර

වී  ලෝ දහම මනහර

පුතු සිත තබමි   කවි කර

දිනක යමි ඔබ අතහැර

මම  ආ ගමන නිමකර

 

පුත නුඹ උපන් එදවස

දැනිනි  මා  සක්විති ලෙස

පිපුනි සිත්  මල් සහස

ඇසිමි පතුලින් ජය ගොස

 

බිම පත් ලේන් පොවු ලෙස

හඬන විට මා අභියස

ඉනූ   දරු සෙනෙහස

ඉහිරුණි අගින්  මා ඇස

පෑ  භව මතක තරු රැස

ඔබය  පුතු කප් සුවහස

සිහිවී පෑමි මදහස

මට මා පියා කී බස

යා හැක සිනාසී බැස

තබා බර පුතු උර හිස

 

මා මිලින වූ දවසට

නොසිතව සැවය පියෙකුට

ගෙවා මිල මල්කරුනට

සරසා ලෙසට මඟුලට

හොවා මල් මත සැපට

නිගා නොකරනු මෙමට

නොවටී සිරුර දරකට

සලකා ගැරඩි කුණකට

වඩා නොතබා දිනකට

ඉවතලනු කය සොහොනට

 

දරු සෙනෙහස මහත

කවි කරවන්න පද නැත

තබා දරුවන් හිස මත

රකී  ලෙස තම දෙනෙත

නොසිදේ බිදක් දරු සිත

යතත්  ගිලිහී  මුකුලිත

සුවඳ රැඳී  සේ  මල් මත

තරු වී  දිලී ගගනත

දරුවන් වෙතම  දියනෙත

සිටී නම් දුක්  සුළි මත

තැවී නොනිදා යහනත

දරු දුකින් වී කම්පිත

උණුවේ සැණින් හදවත

සුළං රැල වී  සිඹ නෙත     

අහස ගුගුරා වැළපෙත

කඳුළු වගුරා පියසි  මත

නළවයි  පෙමින් මිහිකත 

Gasai Valai-ගසයි වැලයි-Tree and Vine-Mathaka Amathum-Nimalasiri Kalubadanagama

ගසයි  වැලයි

                                             Photo by Tahir Shaw: www.pexels.com

ඉවුර අග නිල් දළු දරා මම 

ඔබට සෙවණක් සදා දෙන්නැති

ඔබ ලතාවක් වී වෙලී ගත 

හිස  හොවා ලය  රැය ගෙවන්නැති

ඔබේ  හුස්මක සුවඳ මට දී 

මගෙන්  උණුහුම් සුසුම් ගන්නැති

සියුමූ ඔබේ අත්පසුරැ තුඩු’ගින් 

සෙනෙහෙබර පිරිමැදුම් දෙන්නැති

කුමුදු මල් පොඩි අයාගෙන මුව 

සුවඳ දී  ඇස් වසා ගන්නැති

වළාකුලකට මුවාවී සඳ 

ගං දියේ  ගිලි   සිනාසෙන්නැති

ගඟේ රැළි  පංසිළු ව පරදා 

නිම් නැතුව  පෙම් ගී ගයන්නැති

ගං දෑල තරු  කිනිති අතුරා 

අහස  සතුටින් පිනි ඉසින්නැති

 

අපේ පණ  ගෙන නව ළපළු ඉති  

එතී  ඇස පාමුළ සිටින්නැති

දෙවුර  මත මගෙ  උකුල මත ඔබේ 

දණගගා කිරි සුවඳ දෙන්නැති

හිරැ බසින  පඬු අහස යට තරු 

වැටෙන හැඩ බල බලා ඉන්නැති

මගේ  නෙත් ඔබේ දිලෙන නෙතගින් 

අමුතු තරු එළි අහිද ගන්නැති

අපේ  ලෝකෙම   රැජින වී ඔබ 

පෙම් කිරුළ මිණි හිසදරන්නැති

 

අඳුරු හවසක  ගුගුර ගුගුරා  

අසනි  වැසි හී  තුඩු   හෙලන්නැති

අයා මුව ගං දිය රකුසු වී 

දස දිසාවම  වසාගන්නැති

අපේ ජිවිත ලෙහා ඉන් 

සා පැටවූ ජීවිත ගැට ගසන්නැති

රුදුරැ මරු දත් විළිස්සද්දිත්  

දෑත් පටලා  මුව සිඹින්නැති

ඔබේ  අන්තිම හුස්ම මට දී 

මගෙ හුස්ම ඔබ අරන්යන්නැති

නිමානැති  මේ සසර යළි ඒ 

සුවඳ පොද සොය-සොයා එන්නැති

Sihina Pini Bidu-සිහින පිනි බිඳු-Dewdrops of Dreams-Mathaka Amathum-Nimalasiri Kalubadanagama

සිහින පිනි බිඳු

                                                                        Image by JillWellington:pixabay.com 

සිත් ගුහා ලෙන සිද බිඳ

ඉගිලී  සිහින මෙරු කැළ

තටු හලා ඇස්  පියන් අග

පලා ගිය  අද රැයකි නිදි දුව

 

දිලෙන තරු යුවළක එළිය වැද  

රිදුම් දෙන ලය  මඩල පිරිසිද 

රැ දවල් සෙනෙහයෙන් ඇහිදින

සිහින පොට්ටනි  ලෙහා එක එක

සුසුම් ලා ගිනි උදුන පිඹ පිඹ

උණු කලෙමි හිම මිදුණු සිහිනය

 

හිමිව නැත ඒ  මේඝ දූතය

පරෙවි සැළලිහිණින් කොහිද මට

සුවඳ පොදකින් ඔබව හඳුනන

මගේ  හදවත පියා සල සල 

යයි තුඩින් ගෙන  සිහින මුතු පොට

 

ඔබ නිදන උස්‌ කුළුණ පාමුල

පිපී ඇති ලා උඳු  පියළි අග

ඔබේ සුන්දර සිනා දැක දැක

දිලෙන්නට ලා හිරැ කිරණ වැද

සිඹින්නට ඔබෙ සුමුදු පා යුග

තබා එමි මගෙ සිහින පිනි බිද

 

එපමණකි හද ඉතිරි සිහිනය